Wapampando wa bungwe loyendesa ntchito za chisankho mdziko lino la Malawi Electoral Commission (MEC), Justice Dr. Chifundo Kachale wati bungweli madzulo ano layamba kutumiza m’maboma kalata zoponyela vote pa chisankho cha President chomwe chichitike lachiwili sabata la mawa.
Padakali pano zipani zotsutsa boma zomwe zili mu mgwilizano wa Tonse zati zitumiza anthu ake oyang’anila chisankho omwe apelekeze galimoto zonse zomwe zinyamule katatazi.
Kalata zoponyela voti zafika mdziko lino pomwe nthawi imati 11:30 m’mawa pa ndege yochokera mdziko la Dubai pa bwalo la Kamuzu International Airport (KIA) ku Lilongwe. Zikalatazi zidalandilidwa ndi wapampando wa bungwe la MEC Justice Dr Chifundo Kachale, akuluakulu a police ndinso asilikali a nkhondo a MDF.
Akachale afotokoza kuti ngakale zokonzekela zikuyenda bwino. Bungwe lawo lalandila 2 billion Malawi Kwacha kuchokera pa 10 billion Malawi Kwacha yomwe anapempha Ku nthambi yosunga chuma cha Boma.
Afotokoza kuti ali ndi chiyembekezo choti zonse zikhala m’malo pomafika lolemba kuti Chisankhochi chichitike.
