Mkulu wa bungwe lomenyela ufulu wa anthu m’dziko muno la Human Rights Ambassadors (HRA) Ben Longwe wati akuganizira kuti anthu ena omwe alinawo mu bungweli akumalandira ndalama kuchoka ku boma ndicholinga chomalepheletsa zionetsero zikati zakonzedwa kuti zichitike.
Dzulo bungweli linakoza zionetsero zotsutsana ndi ulamuliro wa Tonse Alliance zomwe pamapeto pake zinalephera.
M’modzi mwa akuluakulu a bungweli Redson Munlo anauza Malawi Metro News dzulo kuti zionetserozi zalepheleka kaamba koti anthu ena anawaopseza kuti awagwira m’thupi akapitilira ndi ganizo lochita zionetserozi.
A Longwe ati ndiokhumudwa kaamba koti anthu ena akufuna kwabwino amawapatsa ndalama kuti zigwire ntchito pa zionetserozi koma kwa kanthawi zionetserozi zakhala zikulepheleka.
Padakali pano a Longwe awopseza kuti atuluka bungweli ndikuyambitsa gulu lina ndicholinga choti zinthu zidziyenda momwe akufunira.
