Osewera wakale wa timu ya Moyale Barracks Khuda Ikenna Muyaba walavula moto pomwe wati osewera ena a timuyi sakudzipeleka posewera masewero awo
Muyaba wati osewera ena a Moyale barracks anakhutitsidwa kuti analowa chabe ntchito koma mtima wawo suli pa mpira
Khuda walankhula izi kudzera pa tsamba lake la mchezo kutsatira kugonja kwa timuyi 4-1 ndi timu ya Silver Strikers pa bwalo la Bingu lero
Iye waloza chala osewera ena monga Raphael Phiri kuti sakugwira ntchito yake yomwetsa zigoli
Mkuluyu wati osewera kutsogolo mmodzi yemwe ndi Gastin Simkonda ndi yekhayo yemwe ali ndi mtima osewerera Moyale barracks
Iye anati ,”uyu akuvala jersey 10 Raphael Phiri kaya ali ndi chigoli kaya koma wasewera masewero mwina 20, uthokoze kuti unapeza ine nditachokako.”
“Mukufuna kuti timu ituluke eti? Inu achina Maneno Nyoni, George Nyirenda, Ntopinjo Njerwa, Prince Phiri?”
Timu ya Moyale barracks ili pa nambala 14 mu TNM Super League ndi ma point okwana 23 pa masewero 21 omwe yasewera
