Apolisi m’boma la Zomba amanga bambo Edson Peter a zaka 28 pamodzi ndi mkazi wawo a Esther Jonas a zaka 22 pa mlandu woti anapha mwana wawo wa mamuna wa zaka ziwiri (2) yemwe dzina lake ndi Evance Joseph yemwe anamwalira mu January 2020 mu mzinda wa Zomba.
Bamboyo pamodzi ndi mkaziyo anakwatirana zaka ziwiri zapitazo ndipo bamboyo anapezeka mkaziyo ali ndi mwana kale (Evance Joseph) pa nthawi yomwe amkakwatilana.
Mu January 2020, banjalo limkakhala ku Chilupya pomwe bamboyo amkapanga malonda ogulitsa tchipisi Pa 3 Miles.
Tsiku lina bamboyo anafika ku nyumba usiku atagula botolo la mafuta ophikira, mwanayo yemwe ndi Evance Joseph amkasewera kenako anatenga botolo la mafuta ophikirawo koma mwa ngozi mafutawo anatayika zomwe zinapangitsa bamboyo kupsa mtima mpakana anamukakha mwanayo kumugwetsa pansi kuchokera pa nkhonde kenako mwanayo anakomoka koma bamboyo pamodzi ndi mkazi wakeyo anamusunga mwanayo m’nyumbamo osapita naye ku chipatala mpakana mwanayo anamwalira kenako bamboyo ndi mkaziyo anakumba dzenje ku munda wa chimanga komwe anakamukwilira mwanayo popanda kudziwitsa munthu aliyense za nkhaniyo.
Bamboyo ndi mkaziyo amkanamiza anthu kuti mwanayo anamupititsa kwa agogo ake ku Mulanje kukacheza akhala kuti akufunsidwa mafunso ndi anthu okhuza kusowa kwa mwanayo kenako banjalo linachoka ku Chilupya ndikumakakhala ku Namikango trading centre.
Pa 30 July 2020 bamboyo ndi mkaziyo anakangana mpakana mkaziyo anapita ku mudzi kwawo ku Mulanje koma atafundidwa mafunso okhuza za mwana wake uja iyeyo ananama kuti mwanayo ali ndi mamuna wake yemwe ndi bambo omupeza a mwana uja koma atamupanikiza ndi mafunso mzimayiyo anavomereza kuti mwanayo anamukwilira m’munda wa chimanga kenako mzimayiyo a Esther anamwa mankhwala kuti adzithe yekha pothawa mlandu wokupha koma sanamwalire Kamba koti anthu anamutengera ku chipatala mwa changu.
Apolisi pa 3 July 2020 anamanga bamboyo pamodzi ndi mkazi wakeyo pa mlandu wokupha, kubisa imfa ya munthu, kukwilira munthu komanso mlandu wofuna kudzipha.
Edson Peter amachokera m’mudzi mwa Sanjika T/A Kwataine m’boma la Ntcheu pomwe Esther Jonas amachokera m’mudzi mwa Kamoto T/A Mkanda m’boma la Mulanje.
